बेलायतमा मासिक ४ लाख तलब पाउने गरी १० हजार नर्स पठाइने सरकारद्धारा सांसदलाई जानकारी

समाचार

काठमाडौं । सरकारले बेलायतमा मासिक करिब ४ लाख तलब प्राप्त हुने गरी रोजगारीका लागि नेपाली नागरिक पठाउने प्रक्रिया सुरु गरेको औपचारिक जानकारी दिएको छ ।

बजेटको मन्त्रालयतगत शीर्षकमाथिको छलफलमा उठेका प्रश्नहरुको जवाफ दिँदै सोमबार श्रम, रोजगार तथा सामाजिक सुरक्षामन्त्री कृष्णकुमार श्रेष्ठले १० हजार जनशक्ति बेलायत पठाउने गरी सम्झौता गर्न लागेको जानकारी दिनुभयो । उहाँका अनुसार बेलायतमा पहिलो चरणमा नर्सलाई पठाउन लागिएको हो ।

मन्त्री श्रेष्ठले जापान, कोरिया, न्युजिल्याण्ड लगायतका देशमा श्रमिक पठाउनका लागि समेत पहल भइरहेको सदन मार्फत आम नागरिकलाई जानकारी दिनुभयो ।

सांसदहरुले मन्त्री श्रेष्ठलाई श्रमिकलाई बाँच्न पुग्ने न्युनतम ज्याला हुनुपर्ने, रोजगारी सिर्जनामा ध्यान दिनुपर्ने, स्वरोजगार र विदेशमा गएकाहरुको सुरक्षा गर्नुपर्ने, वैदेशिक रोजगारी घटाउने योजना हुनुपर्ने, श्रम स्वीकृति सातै प्रदेशबाट हुनुपर्ने, सरकार–सरकार मार्फत विभिन्न देशहरुसँग श्रम सम्झौता गर्नुपर्ने लगायतका सुझाव दिनुभएको थियो ।

जवाफ दिँदै मन्त्री श्रेष्ठले सांसदहरुले उठाएका प्रत्येक प्रश्न र सुझाव अनुसार अगाडि बढ्न आफू प्रतिवद्ध रहेको स्पष्ट पार्नुभयो ।मन्त्री श्रेष्ठले जापानमा रोजगारीका लागि श्रमिक पठाउनका लागि छिट्टै प्रक्रिया अघि बढाइने पनि बताउनुभयो ।

Leave a Reply

Your email address will not be published.